*انت مين بقى ؟*
انا ياسمين بنوتة بسيطة جدا بتحلم انها توصل بس لنجمتها
واللى بتمثل لها كل احلامها
*عندك كام سنة ؟*
عندى 14 سنة
هل انت متزوج ؟ وهل عندك اولاد ؟
اكيد لأ لسة . لسة بدرى خاااالص
*دراستك ايه ؟*
ثانوى عام . وسنة اولى لسة
ربنا معايا بقى ادعولى
*هل تمارس عملا بشهادتك ام عمل حر ؟ وما هو ؟*
لأ اكيد بشهادتى وهو المدرسة والدروس طبعا
ههههههههه
*ما هى مدة عملك اليومية ؟*
لأ احسبوا معايا بقى
المدرسة من 7 ل ... 12.5 او 1 يعنى
يبقى 7 ساعات تقريبا وضيف بقى عليهم 3 ساعات مثلا دروس
يبقى 10 ساعات يوميا تقريبا يعنى وبيبقى على حسب بقى
ايه دة كل التعب دة عشان مدة عملى يا نهار ابيض اومال عملى بقى يبقى ايه
هههههههههه
*ماذا تفعل بوقت فراغك ؟*
هعمل حسابى ان فى اصلا وقت فراغ
فبيبقى احيانا فى الرسم والتلوين دة اساسى
والنت والكمبيوتر طبعا وممكن تكون الغزالة رايقة واكتب خواطر يعنى
ههههههههه
*هل لديك هوايات ؟ وهل تمارسها ؟*
عندى هوايات كتير وبمارسها فعلا ولو حتى فى الاجازة
زى الرسم والكمبيوتر . قرصات بقى وكدة
هههههههههههه
*هل تشعر برضا ربنا عنك ؟*
بصراحة هو احيانا بس انا بدعى بالرضا دة اكيد
مين عارف بقى يارب يكون بجد فى رضا
*هل تحب ؟ ومن بقلبك الان ؟*
اكيد بحب على طول كمان : لانى مؤمنة جدا ان مافيش حد مش بيحب
حتى لو حب الله والاخ والاب وكدة . مش لازم للحبيب يعنى
وانا فى قلبى كل الناس اللى بحبهم وفى بالى على طول كمان
*لو لم تجد من تحب . فماذا تفعل ؟*
لأ دى صعبة اوى بجد وحقيقى
لأ بجد يارب ابدا مش فى حد يحس بالاحساس دة ابدا
وطبعا دة حب الحبيب لاننا اتفقنا ان مش فى حد مش بيحب . هههههه
*عندما تكون فى موقف اتخاذ القرار . تخالف الجماعة . ام تشترك مع الاخرين ؟*
والله على حسب رأيهم هم لو رأيهم مقنع ومن رايى انا كمان
لأ دة بشاركهم فيه
لكن لو مش مقتنعة بيه بخالفهم وبعمل اللى انا حساه يعنى ودة بيحصل احيانا
بس لو الموقف دة فعلا يخصنى انا بس
*هل تتعامل بواقعية ؟*
اى نعم دة ضد شخصيتى اللى هى مرحة وخيالية شويتين
لكن لو موقف جد يتطلب الواقعية لأ فى دة بكون جد فعلا و جد اوى كمان
*ما هو الشئ الذى فعلته وندمت عليه طول عمرك ؟*
هو انى كتير امنت لناس ووثقت فيهم وفى الاخر طلعوا مش يستاهلوا خالص
وطلعوا كمان اسوأ مما يمكن ومما كنت اتصور اصلا
*هل تصارح احد بالحقيقة ؟ ام تقول له ما يريد سماعه ؟*
لا لا انا صريحة جدا بطريقة غريبة اوى لدرجة ان فى ساعات ناس بتزعل من صراحتى دى
مع انها بتكون ليها حدود وتكون بادب طبعا
لكن انى اقوله اللى هو عايز يسمعه ! لأ دى صعبة شوية
*بس انا مش شايفة الصراحة دى مش مشكلة يعنى ولا ايه ؟*
انا قلت كدة كدة برضو ههههههه
*صف انسان يمكن ان تحبه عمرك كله*
ممممممممم مع ان السؤال دة غريب شوية لكن هجاوب عليه
طيب وحنين ورومنسى اكيد ومرح ومش عصبى اوى كفاية عصبيتى انا يعنى
ويبقى اكيد يحبنى جدا ويخاف عليا ويكون دايما واثق فيا ... وحجات كتير برضو مهمة
*متى يقسو قلبك ؟*
بالرغم ان كلمة يقسو دى غريبة عليا شوية بس مش كتير ومش على اى حد
لان انا طبعى قلبى طيب ومتسامح شوية لكن برضو اعترف ان دة كله مش مع كل الناس
يعنى زى الناس اللى جرحونى او وجعونى اوى يعنى
*ومتى يقسو لسانك ؟*
لسانى ؟ ! لأ دة كتييييير بس بادب برضو والله مش قسى اوى يعنى
لان ربنا دايما هو اللى بياخد حقى ودة من دعايا طبعا
*من هو اول من قلت له بحبك ؟*
لأ مافيش لان الكلمة دى بحس انها صعبة ومش سهل ان الواحد يقولها
بس مين عارف . يمكن
*هل يمكن ان تحب احد من المدونين ؟*
لأ مش ممكن لانى مش مع الحكاية دى اصلا ان الحب يكون عن طريق النت والمدونة وكدة
دى بجد ومن وجهه نظرى طريقة مش ناجحة اصلا
*وهل يمكن ان يكون شريك حياتك ؟*
اكيد لأ . دة غير بقى لو اتقبلنا صدفةّ يعنى . مين عارف يمكن الله اعلم بقى دة نصيب مهما كان
*ماذا تعنى لك المرأة والرجل ؟*
اه اولا المرأة فهى نص المجتمع
والرجل بقى فهو اكيد النص التانى من المجتمع
اقصد ان هم الحياة اللى مش نقدر نعيش الا بيهم هم الاتنين مش حد منهم
*فى زمن البحث عن المادة . عن ماذا انت تبحث ؟*
انا دايما ببحث عن اهم حاجتين فى حياتى كلها
وهم التفوق والحب بيتهيألى دول بقى من غيرهم مانقدرش نعيش فعلا
*ماذا تعرف انك تحب ؟*
ممممممم لأ دة انا مجربتوش بالمعنى اللى السؤال يقصده
لكن الحب بتاعى انا بقى فبعرفه
انى بتمنى لو افضل قدامه وافكر فيه كمان كدة على طول
وانى بغير عليه من الهوا وبخاف عليه منه كمان
وانى اكون شايفاه هو حياتى كلها بكل شئ جميل فيها
و ....... حاجات كتير مش هعرف اقوللهالكم كلها دى لو اتعدت اصلا
*ما هى الشخصية اللى اثرت بحياتك ؟*
لأ بجد كتير اوى لانى بقول ان كل الناس اللى قابلتهم بجد اكيد اثروا فى شخصيتى ولو بشئ صغنون خالص . لكن اكتر الناس اللى اثروا فيا وببهم اوى اوى اكيد هم
بابا طبعا اولهم . وماما واخواتى برضو اكيد
وطبعا خالو ومراته بجد اتعلمت منهم كتير
واكيد حبيبتى واختى مش المس بتاعتى وبس وهى يويو ويارب تكون معانا بجد قريب لانها وحشتنى كتير واتعلمت منها اكتر
*هل يوجد من تراه فى الدنيا سعيدا ؟ ولماذا ؟*
من وجهه نظرى هو كل انسان اهله وخصوصا مامته راضيين عليه وربنا طبعا اكيد
دة بقى بيبقى اكيد سعيد فى حياته
*سيارة وسائق ووقت متاح ... تذهب الى اين ؟ ولمن ؟ بالترتيب . ام تفضل ان تكون وحيداّ ؟*
الله السؤال دة جميل اوى يارب يتحقق
و حكاية انى افضل انى اكون لوحدى لأ دى مستحيل
لكن انا هستغل الموقف الرائع دة وهقرر انى اطلع على طووووول
على اسكندرية ولمن ؟ هروح هناك للبحر بيتهيألى دة بقى مافيش احلى من كدة
لانى مجنونة بحاجة اسمها اسكندرية ولدرجة انى لغاية دلوقتى بتمنى انى اعيش فيها وان كليتى تكون هناك وتبقى بالتحديد فنون جميلة وبالتحديد اكتر قسم ديكور
هههههههه ادعولى بجد من قلبكم . دة مستقبلى بجد
*ما هى درجة صراحتك ؟*
لاااااا مليون مليون فى المية
لان الحكاية اصلا انى مش بعرف ولا اكذب ولا اجامل
صريحة بقى تقول ايه
*ما هى المواقف التى يمكن ان تكذب فيها ؟*
فى الخير يعنى لو فى مشكله والحل بتاعها انى اكذب يعنى زى وانا بصالح حد على حد تانى
ولو اجابتى فيها مشكلة كبيرة
ودول بقى ربنا يسامحنا فيهم يعنى
*هل يتغير الحب بعد الزواج ؟*
والله على حسب الطرفين ذات نفسهم يعنى
لو مش انانيين ومش بيفكروا بطريقة سليمة ومتسامحة ومش بيحافظوا بجد على حياتهم وبيتهم اكيد
*فيما تفكر الان ؟*
فى خالو حبيبى . ربنا يرجعه لينا بالف مليون سلامة بجد
*لو لم تعيش فى مدينتك . فاى مدينة اخرى تفضلها ؟*
اكيييييييد فى اسكندرية طبعا
ادعووووولى بقى بجد
*من اول من ياتى ببالك لتحكى له اسرارك ؟*
اكيد ياسمين هههههههه
لا لا مش واحدة غيرى دى انا
لان الانسان اللى بحب انى احكيله مش بيبقى معايا على طول
اما اتخيل انى بحكيله يا اما احكى لياسمين حبيبتى بقى
مش قدامى حل تانى يعنى
*من هو ألد اعدائك ؟*
لأ ناس كتير واكيد كنت واثقة فيهم واتخدعت كالعادة زى اصحابى مثلا
حاجة غريبة بجد
*من هو صديقك ؟*
كل الناس اللى بحبهم بجد فدول اصدقائى
لكن اصدقاء اصدقاء بجد وكدة فللاسف مافيش
معقدة مش كدة . ربنا يهدينى بقى
*لو الدنيا كلها زيك . لمن تقول هذه العبارة ؟*
ممممممممم
اكيد لبابا وماما وخالو ومراته و ... لأ معقول دول بس
تقريبا كدة انا عايزة اكتر من كدة ايه
ههههههههه
دة دول بالدنيا كلها
*ماذا تكره فى الحياه ؟*
الخيانة والكذب والشك وان حد ياخد حاجة مش بتاعته
وحاجات كتير كتير للاسف
*ماذا تحب ؟*
الصداقة اللى عمرى ماحستها بجد
الحب والنجاح والورد والفراولة والاكسسوار وكل ادوات الديكور ودى مؤخرا والالوان و ..... الحياة كلها بجد بكل شئ جميل
*كيف تواجهه ما يضايقك ؟*
بالبكاء غالبا اكيد والعصبية احيانا برضو
يعنى مرحلتين عصبية وبعدين عياط
ربنا بجد يبعدهم عننا كلنا يارب
*وماذا تفعل عند المفاجأت ؟*
المفاجأت .. لأ بخاف منها اوى مش عارفة ليه يعنى
لكن مثلا لو لعيد ميلاد كدة يعنى لأ دى عادى بحبها
*لو معاك فلوس اكتر مما تتخيل . فماذا تفعل بها ؟*
اول حاجة هنطلع نحج كلنا انا وعلتنا كلها يعنى
وهبنى بيت كبييييير نعيش فيه كلنا وهيبقى اكيد طبعا فى اسكندرية معروفة دى بقى
ههههههههههه
*هل الفقر يصنع الحب ؟*
مافيش حاجة بتصنع الحب
الحب دة بيجيى كدة من غير ما نقصد حتى ومافيش حاجة تأثر فيه
مهما كانت فقر. غنى. قوة. ضعف ... ولا اى حاجة فى الدنيا دى كلها
الا بقى لو ماكانشى حب من اصله
*وماذا لو وجد الحب فى زمن الفقر المادى ؟*
ولا هيحصل اى حاجة مش هتفرق دة لو برضو ماطلعشى حب حقيقى بجد
*ما هى اقصى صدمة تعرضت لها حتى وقتنا هذا ؟*
كالعادة برضو لما اتصدمت فى ناس عزيزة اوى عليا وثقت فيهم
*وكان رد فعلك ؟*
والله كفاية دعايا عند ربنا يعنى
يعنى من الاخر وبصراحة دعيت عليهم بس مش دعا جامد يعنى لأ هو دعا ان ربنا يعنى ياخدلى حقى منهم مش اكتر
*هل تعلمت منها شئ ؟*
اكيييييد وهو انى ما امنشى لحد بسهولة اوى يعنى
وبيتهيألى هو دة الحل الوحيد . ولو عندكم حل تانى قولولى بجد
*هل انت على استعداد لتلقى صدمات اخرى ؟*
والله الواحد مش ناقص بقى ولا ايه ؟
وعلى ما اعتقد ان ماحدش بيتمنى حاجة زى كدة
ومين عارف اللى يعيش ياما يشوف
ودة بجد فعلا حقيقى ههههههههههه
*كيف ترد على من لا تصدقه ؟*
والله على حسب الشخص اللى قدامى
لو شخص بجد بكرهه ومش مرتحاله ودة غالبا بقوم كاشفاه عشان مايعملهاش معايا انا بالذات تانى
لكن لو شخص لسة سنة اولى فى الحكاية دى بعديهاله دة لو ماتماداش فيها
بأدّبهم شوفتوا مش كدة
هههههههه
بس مش قصدى والله بنفس المعنى دة بجد
*اذا احببت انسان ما . هل تصرح له بحبك ؟*
ما انا قولتلكم الكلمة دى بجد بحس انها صعبة
بس برضو هفضل اقول مين عارف يمكن
ههههههههه
*ماذا تفعل لو لم يتجاوب معك ؟*
اولا المفروض ان انا بنت يعنى المفروض يعنى من وجهه نظرى ان مش البنت هى اللى بتبدأ بالاحساس دة يعنى
*هل تؤمن بالمثل القائل : انا احب فانا اعيش ؟*
اكيد طبعا الحب دة اساس الحياه اللى بجد مش نقدر نعيش ابدا من غيره
لان من غيره ابدا مش تبقى حياه
*ما هى القضايا التى تشغل بالك ؟*
اكيد طبعا لانها بتهمنى كتيييير وهى قضية الثانوية العامة
وكمان لدرجة انى بحس انى انا الوحيدة اللى اقدر احللها
احتمال برضو مين عارف ههههه
*هل تستطيع تحقيق كل احلامك ؟*
اكيد اقدر ان شاء الله يعنى بس برضا ربنا وبرضا اهلى وكل الناس عليا
وبالايمان وبالعزيمة والاصرار والثقة و... وحاجات كتير اوى
من دول اكيد هقدر ومن دعواتكوا انت كمان اكيد هقدر
*هل تمتلك طموحا . وما هو ؟*
اكيد كل انسان عنده طموح وامل يا اما مش يكون عايش اصلا ودى اصعب حاجة فى الدنيا
وهو انى احقق اللى بتمناه وهو انى ادخل كلية فنون جميلة قسم ديكور بتفوق وافضل كمان بالتفوق دة طول عمرى
وشوفتم بقى بجد لأ سيبوها على الله وادعولى بجد لانى عيطت من كتر خوفى من ان الحلم دة مش يتحقق
فبجد سيبوها على الله زى ما انا هسيبها كدة وادعولى بجد
*كيف سيتحقق طموحك .ام سيبقى حلم فقط ؟*
زى ما قولتلكم قبل كدة بالرضا ورضا ربنا عليا ورضا اهلى وكل الناس عليا
وبالايمان والاصرار والعزيمة والثقة بقدراتى وبنجاحى اكيد ان شاء الله وباذن الله هقدر احققه وعمره ما هيبقى حلم فقط
ان شاء الله وباذن الله فى الاول وفى الاخر
*ما هى علاقتك بالدنيا ؟*
عن نفسى انا فانا بحب الدنيا والحياة حتى لو فيها بكيت
لكن علاقتنا كلنا بيها هى اننا كلنا ضيوف فيها
*وما علاقتك بالموت ؟*
لأ بصراحة مش كويسة خااااالص
ههههههه
لا لا اكيد بكون مستعدة لاى وقت طبعا وهى سنة الحياة
بس بصراحة اكيد بخاف من اللحظة دى
يارب بقى ربنا يكون راضى علينا لان دى اهم حاجة فى الدنيا اكيد
*لو لك اختيار زمن تعيش به . فما هو ذلك الزمن ؟ ولماذا ؟*
اكيد زمن الرسول صلى الله عليه وسلم
لان بكدة انا هقدر اتمتع بالنظر الى وجهه الكريم
ربنا يكتبهالنا بقى ان شاء الله فى الجنة
*هل يمكن ان اراك وانت غائب ؟*
لو انا انسانة عزيزة عليك فيبقى دة اكيد . انا مجرباها كتييير
*ماذا ترى فى نفسك مميزا عن الاخرين ؟*
لأ دى بقى اللى ماعرفهاش
هو دة السؤال اللى بجد هسيبكوا انتوا اللى تجاوبوا عليه
بجد مش بهزر ومستنيه الاجابات حقيقى
*من اذا اقترب منك .هربت منه بعيدا ؟*
مش عارفة يمكن الموت بس دة مقدرشى اهرب منه ابدا
يمكن الفشل ودى اكتر كلمة بكرهها ويمكن كلام كتير زى كدة يعنى
*من تقول له : قرب منى قرب . يا قلبى يا ما اتغرب ؟*
اقول كدة لكل الناس اللى بجد غايبين عنى بقالهم كتير
*ماذا تريد ان تقوم به قبل ان تموت ؟*
انى اكيد احقق كل احلامى وكل اللى بتمناه وان كل الناس تكون راضية عنى وربنا اكيد
وانى اكيد ان شاء الله احج
* * * * * * * * * * * * * * * * * * * *
خلص التاج التانى يارب ما اكون طولت عليكوا بس انا عن نفسى استمتعت بالتاج دة جدا حقيقى تحياتى لأ/ محمد و لتوتة همسات على ضوء القمر بجد وحشتنى اوى هى ويويو حبيبتى بجد وحشتونى كتير
ويارب ما تكونوا مليتوا منى وبرضو هفضل مستنية اجاباتكم على بعض الاسئلة اللى فى التاج
تحياتى ليكم كلكم
* * * * * * * * * * * * * * * * * * * * *
ومعلشى اتاخرت عليكم ما انتوا الامتحانات قربت والمراجعات بدأت فمعلشى اعذرونى غصب عنى حقيقى. ومش تنسوا ادعولى بجد لانى محتاجة لدعائكم اوى
Falling hearts Here
.jpgu.jpg)
.jpg)
